“إلى السادة المسئولين” … أبرز تعليق من تامر مجدي بعد فصله من العمل
إلى السادة المسئولين” … أبرز تعليق من تامر مجدي بعد فصله من العمل
كتبت:شروق ممدوح
نشر الفنان تامر مجدي عبر حسابه الشخصي بموقع التواصل الاجتماعي “فيسبوك” بوست يناشد من خلال المسئولين عن ما حدث له.
كاتبًا: “بصوا يا جماعه في موضوع حصل معايا بقاله فتره وكنت بكتب تنويه عنه وساكت مش راضي أفصح عنه ل سببين، السبب الأول هو أن قولت اصبر لحد اخر لحظه ومتسرعش اتكلم فيه علنا، السبب التاني هو اني ممثل ومعتقدش أن الموضوع ده حد يعرفه عني غير الناس القريبه مني، لكن جيه الوقت الي هقول واكيد انتوا هتقفوا جنبي”.
متابعًا: “لان عندي مئات الآلاف من الاخوات والأصدقاء علي السوشيال ميديا وفي ضهري، والموضوع ظلم وحقد واي شئ ممكن تسموه، بداية الموضوع هو اني كنت شغال جنب التمثيل في شركة بتروجيت وبقالي ٦ سنين فيها تحت التعيين وحققت نجاحا في شغلي الحمدلله بشهادة كل زمايلي والمديرين”.
مضيفًا: “بالاضافه أن تم تكريمي هناك كمان مش عشان انا ممثل لا ..عشان انا اثبت نفسي ف كام سنه بي شغلي ..كان ليا أحد الأقارب من المديرين الكبار ف الشركه وعلاقة طفيفة جدا وطلع علي المعاش وانا كنت تحت التعيين وكان ليا تأمينات وعلاج من الشركة وكنت معروف اني ممثل هناك وكل الناس بتحبني وحتي أبنائهم ف البيوت كانوا بيكلموني ف التليفون وعلاقتي بكل الناس هناك كل الاحترام والتقدير وكنت بفضل بقدر افصل بين اني ممثل واني موظف في شركة وكنت ناجح ف الاتنين الحمدلله ..وعمري ما شوفت شغلي في شركة كبيرة زي دي عيب أو بتقلل مني كممثل بالعكس أنا فخور بنفسي اني مش قاعد ف البيت بستني دور يجيلي”.
متابع منشوره قائل: “انا يجتهد وبشتغل ليل ونهار لحد ما ربنا يختارلي الطريق الصح الخير ليا وأكمل فيه …لكن بعد امضائي عقد التعيين والتثبيت ب ١٥ يوم فجأة تم فصلي وإخلاء طرف ليا من الشركة بدون اي سبب واضح وصريح …عملت كل الاتصالات والتواصل بس المسؤولين ف الشركة لم اجد سبب واضح أو حل للموضوع”
مواصلًا حديثه: “لكن وجدت ردود عايمه ..هو أن انا مثلا بيتقال فصلوك من الشركة عشان انت ممثل ومش محتاج للشركة، هو أن تصفية حسابات بين مسؤولين من الشركة وبين قريبك الي طلع علي المعاش ..أو أن في مسؤل مش بيحبك وسمع انك ممثل ومش بتاع شغل ..طب مش بتاع شغل ازاي وبتكرم من مساعد رئيس الشركة علي مجهودي ف الشركة !!!!!! او انك مارست مهنه جديدة غير مهنتك التعاقديه واصلا نص الشركة شغاله كده عادي جدا وبيتعمل مذكرة تغيير المهنه وبيكملوا عادي بالواسطه داخل الشركة”.
ليتابع: “بالذمة دي ناس مسؤولة وكبيرة تعمل كده لما بدأت اواجهم وتقولهم انا مش هسكت ومش هتكسف اني اطالب حقي جاء الرد بالسخرية ..طب ربنا معاك يا فنان !!! بالاضافه أن كان ف اتنين حصل معاهم نفس المشكله بس هما ليهم واسطه داخل الشركة ومشكلتهم اتحلت ورجعوا وتمام التمام ..لكن انا مليش واسطه داخل الشركة بس الي ميعرفهوش أن عندي جمهور وناس كتير ف ضهري وانا مش خجلان ولا مكسوف من الي بقوله”.
مكتملاً: “انا بتكلم ف حقي ومش فارق معايا الشغل في الشركة بس هتيجي عليا بمزاجك ورب الكعبه ما اسيب حقي ابدا لو علي رقبتي ما هي مش ماشيه بالمزاج دي شركة الدوله مش ملك اهلكم وللعلم انا واحد من ضمن ناس كتير بيحصل معاها اكتر من كده بكتير انا يمكن بيتعاملوا معايا بي احترام لأنهم عارفين اني اقدر اوصل الموضوع اعلاميا وسوشيال ميديا لكن في ناس بتتهان وتتظلم في حقها …شركة بتروجيت هي شركة بترول كبيرة ف الوطن العربي ..وبها فاسدين ومتحكمين ف الشركة كأنهم أصحابها …الشركة دي شركة مصر وتتبع هيئة البترول ومش من حقهم يتحكموا فيها بالشكل ده”.
مختتمًا حديثة قائلًا: “وانا اقولها تاني مش هسيب حقي ومعايا اوراق تثبت كلامي ورسائل منهم …آخرهم رئيس النقابه للشركة الي المفروض بيدور علي حق الناس هو صديق مقرب لي رئيس الشركة ومفيش اي نوع من البحث عن حق الموظفين ف. الشركة ..مجرد شكليات وكراسي …زي اماكن كتير فيها فساد …لو سمحتم الي حابب يعمل شير علي أوسع نطاق يمكن اكون سبب اني اجيب حقي وحق ناس كتير مظلومه ف بتروجيت
الاسماء المسؤولة عن الفصل وإخلاء الطرف
الاستاذ /ابراهيم العسال مدير مكتب رئيس الشركة
الاستاذ/ هاني السيد مدير عام الموارد البشرية
الاستاذ/ احمد السروجي رئيس نقابة بتروجيت
المهندس /الحسيني رئيس لجنة تغير المهن
…لو سمحتم الي حابب يعمل شير علي أوسع نطاق يمكن اكون سبب اني اجيب حقي وحق ناس كتير مظلومه ف بتروجيت والساكت عن الحق شيطان اخرس
#تامر_مجدي