أنفاس الذكريات
أنفاس الذكريات
بقلم/سيد جعيتم
للشوارع والحارات
انفاس ودقات ونبضات
و حواديت وحكايات
وسنين جميلة وذكرايات
عن اللي عايش
واللي زمنه فات ومات
عشت كتير ولا عديت
وايامي جريت ولا دريت
هرب شبابي ولا حسيت
كأني يا دوب
صبحت ومسيت
في حارتنا كنا صحبه
تجمعنا غنوة
وعشرة حلوه
والحلوة علينا طله
تسمع معانا الحدوته
المزيد من المشاركات
والجار بيسأل عن جاره
دايما يطمن على حاله
يقف معاه ف اللي جراله
وصحن البصارة كان
يلف البيوت مليان
ويعود تاني عمران
وحلم زمان يناديني
يرجعني لأول حب
ودقة قلب
اسرح بخيالي تناديني
وصوتها حنان يدفيني
ضحكة جاية
وفرحة هلة
تكونش هيه
معاها بنت حلوة
تقولش غنوه
قالت حفيدتي
حتة مني
رغم تجاعيد السنين
قلبي دق بالحنين
مدت عينيها بالسلام
نظرة فيها كل الكلام
عضمي صرخ وقلت أه
ما قدرت اداري الوجع
ضحكت وقالت يا ولداه
لسه فاكر نفسك جدع