اجمل حوار في تاريخ الدراما التلفزيونية رصده: احمد علي

اجمل حوار في تاريخ الدراما التلفزيونية كان في مسلسل رحلة ابو العلا البشري، كتب اسامة انور عكاشة اجمل حوار في تاريخ الدراما التلفزيونية عن الحب وكان الحوار بين ابو العلا البشري الذي جسده الفنان الكبير الراحل محمود مرسي، و الجميلة الرقية نسرين التي جسدت دور نجوي… 

 

ابوالعلا: مشكلتك انت ومجدي يا نجوي هي مشكلة كل الي بيحبوا الايام دي ..

 

نجوي: مش فاهمة ..

 

ابو العلا: الحب النهاردة صابه الي صاب الناس والدنيا والاخلاق مبقاش ابداً زي الحب بتاع زمان ..

ايام ما كانت الـ3 بيضات بتعريفة ورطل اللحمة بقرش ..

لا يا نجوي انا بتكلم جد ، انا بتكلم عن الحب المثالي بعذريته برومانسيته ، بلمسة الطهر الي فيه بروح الشاعرية الي جواه ، زمان كنا بنحب زي ما نقري شعر او نسمع مزيكا ، او نتفرج علي لوحات ناجي وصبري ومحمود سعيد ، كانت لمسة من الايد ، مجرد لمسة تغيبنا عن الوجدان وكانت نظرة من العين ، تسهرنا للفجر وكانت رعشة الكلمة الحلوة علي الشفايف تبكينا ، تصوري احنا كنا بنخاف من القرب اكتر ما بنخاف من البعد وفي البعد طبعاً نرجع نحن للقرب تاني ،، كانت الاشياء البسيطة جداً في الحياة بيبقي ليها قيمة كبيرة اوي ، وشوشة الريح في الشجر نور القمر في المكان حواليه كل حاجة كان بيبقالها طعم ومعني ومتعة ، اغاني ام كلثوم كنا نقعد نسمعها بالساعات منتكلمش خالص وفي نفس الوقت بنقول كل حاجة عشان كدة الحب كان بيفضل وكان بيعيش يا نجوي مهما فصلت بين المحبين بلاد وفرقت بينهم جبال حتي ، انا حبي لطنطك نعمات استمر اكتر من 30 سنة رغم اننا افترقنا وهي راحت اتجوزت واحد تاني لكن اول لقاء بينا بعد السنين دي كلها كان له فرحت اول مرة اعترفنا لبعض فيها.

 

نجوي: حضرتك يا عمي بتقول كلام عمري في حياتي ما سمعت احلي منه ..ومع ذلك الكلام دة مبيعبرش ابداً عن التجربة الحقيقية الي احنا عشناها .. طيب لية احنا كمان ما نعيشهاش ..؟!

 

ابو العلا: لانكم شيلتوا الفواصل يا نجوي ، كسرتوا الاسوار واختصرتوا المسافات واتحول الحب لاتفاق سريع مباشر كل حاجة فيه سهله المقابلة والتلامس والاندماج مبقاش في حاجة غالية ولا عزيزة ابداً مبقاش يستحق حتي المحاولة بقي زي ساندوتش ، تاكلوا وانتم ماشيين في السكة وتهضموا قبل ما توصلوا ، عشان كدة يا نجوي ، عشان كدة لما مجدي حكالي علي الصعوبات والمشاكل الي بينكم صدقيني انا فرحت ، ايوة لان المشاكل دي بتكبر الحب ، بتصعبه مبتسهلوش ولما الحب بيبقي صعب بيفضل يا بنتي ، بيعيـش ..

 

محمود مرسي ، نسرين ، مسلسل رحلة السيد ابو العلا البشري .