” السعاده قرار والتعاسه إختيار” بقلم دعاء خطاب
توصلت بعد قعده فضفضه مع أصدقائي، وشويه دردشه حلوين
على الماشي.. لأن:
* السعاده قرار مش حاجه ننتظرها تيجي لغايه عندنا وتغير إحساسنا من جوه.. وإن احياناً بتعدي علينا فرص لصنع اوقات من السعاده لو استغلناها وعيشناها في وقتها كانت حتفرق كتير معانا.
* إحنا اللى فى أيدينا نكبر ونصغر قيمه الأشياء والأشخاص وتأثيرهم علينا وإننا لازم نبسط نفسنا بالمتاح في أيدينا ومنستناش حاجات محدده إن مجتش يبقى بلاش.
* نخلق فرص البهجة حوالينا ونصنع سعادتنا من أبسط الأشياء والتفاصيل الصغيره الحلوه في يومنا العادي.
* لازم نركز على نفسنا شويه
ودى مش انانيه ولا حب للذات
ولا تفضيل شئ على شئ.. بس ده ابسط حقوقنا في نفسنا ووقتنا.. بعد عطاء سنين لكل حد في حياتنا مافيش مانع نعيد ترتيب اولويات يومنا ونلاقي لروحنا مكان ومساحه نحقق فيها رغبه اتأجلت او نسعي وراء حلم جاء وقته او حتى نقرأ كتاب اتأخرنا نكمل صفحاته اللي فتحنا اولها واتركن.. حقوقنا على روحنا نشوف ايه يسعدنا ونعمله وايه يتعبنا.. ونستبدله.
* إنسان تعيس مش ممكن ينشئ أطفال ناجحين ولا يربي اولاد
سعداء.. وشريك حياه مرهق، قلقان مش ممكن يكون في علاقه سليمه مثمره.. ولا يحقق ركن السكينه بداخلها.. إنسان أولوياته لنفسه مترتبه غلط.. لا ينتظر تقدير لما يقدمه على جميع المستويات!!
* لازم نفهم إن فى ناس وظيفتها تتغذي على طاقتك.. و وجودهم في حياتك بياخد منها اكتر ما بيضيف لها.. وفى ناس تانيه بعد ما تقعد معاها مودك يتغير للأحسن 180 درجه.. و دايماً معاهم في جديد.. في قيمه.. في معلومه.. في إضافه.. ناس علاقتها بالزائد مش بالناقص.
* السعاده مش بالضروره تُحقق من خلال زواج ولا طفل ولا عمل ولا بيت ولا عربيه ولا مركز ولا مستوى معين من الرفاهيه، دى حاجات نسبيه بتتغير أهميتها من إنسان للتاني واللي مهم جدا عندي ممكن يكون لا قيمه له عند غيري، فبلاش قوالب السعاده وانماط معيشيه نفرضها على حياه بعض، وإن الشعور ده إلى حد كبير ممكن يكون “مرحلى” يعنى اللى كان بيسعدنى من سنين ممكن يكون مش كافى دلوقتي أو قيمته اتغيرت في نظري وحل مكانه حاجه أعلى قيمه بتدخل على قلبي سعاده أكبر.
* حاوط نفسك بحاجات تفرحك وتحسن مزاجك..أغنيه.. رقصه رياضه. …قعده هاديه فسحه حلوه….اكله على مزاجك كتاب تحبه، فيلم سينما وعلبه فشار، حفله فى الأوبرا. ..لبس جميل، أي شئ مهما كان بسيط حيضيف لك طاقه حلوه في يومك.. ويغير في مودك.
*قرب منك الناس اللى بتحبك بجد ويفرق معاهم يشوفوك كويس، واوعى تيجى على نفسك لحد ماتجيب أخرها ماتهدرش طاقتك النفسيه لحساب حد وإياك تبرر نفسك لإنسان مهما كان قربه منك.. اللي فاهمك كويس مش محتاج كل ده واللي بيحبك فعلا بيتلكك يعدي لك علشان يحافظ عليك في حياته إذا حقيقي عارف قيمتك.
* إحساسك بنفسك وجمالك ورؤيتك لروحك نابع من داخلك من ثقتك بنفسك وتقديرك ليها ومعرفه حقيقه بذاتك مش من خلال عيون زوج أو زوجه أو إعجاب الناس بيك ورأيهم فيك.
* وأعظم شئ على الإطلاق إنك تكون راضي عن نفسك لما تحس إن ربنا راضى عنك وبيبعتلك إشارات بقدرك عنده.. بيستعملك وبيسرك لطرق الخير…
” تريد أن تعرف مقامك
أنظر فيما اقامك”.
❤️حب نفسك شويه
حبها زي ما هيه ❤️