” حافظ آه. ..فاهم لأ
عارف آه… مستوعب لأ ”
بقلم/ دعاء خطاب
الناس اللى شاغله نفسها بغيرها
الناس اللى مش شايفه إلا عيوب حياتها
الناس اللى بتقدر تفارق بسهوله وتخاصم
بالاسابيع والشهور وأحيانا بالسنين !!
الناس اللى غضبها قريب وحلمها
وصبرها بعيد!!
الناس اللى بتطلق أحكام وبتصنف
اللى حواليها!!
الناس اللى شايفه كل اللى حواليهم غلط
وهما الصح الوحيد!!
الناس اللى فاكره نفسها شاطره وحويطه
وبياخدوا اللى بيوصل لإيديهم من ربنا
بمهارتهم مش بقدر الله!!
الناس اللى شايفه الطيبه عبط
والحلم تهاون.. اللي متمسكين بغضبهم
ورافضين يسامحوا بعض!!
الناس اللى حياتها متعثره ورغم كده
بينظروا على غيرهم!!
الناس اللى بطلت تعفو وتصفح وتسامح!!
الناس اللى الكلمه الطيبه بقيت صعبه
على نفسهم.. والقسوه منهج حياه!!
الناس اللى خيرهم خساره فى غيرهم!!
الناس اللى منظرهم أمام الناس اهم
كتير من رضاهم عن نفسهم بينهم
وبين ربهم!!
الناس اللى بتستكتر الخير والنعمه
على حياه غيرهم!!
ونماذج تانيه كتير كلنا حنلاقى نفسنا فى
واحد منهم او أكتر .. إذا صارحنا روحنا
بالحقيقه وبطلنا نشاور على غيرنا
وكأننا براهم وبعيد عن الغلط اللي
طالهم .. ومستحيل نقع فيه زيهم!!
إحنا بقينا فى الحاله دى لأننا خالفنا كل
حاجه ربنا أمرنا بيها ماشيين عكس فطرتنا
ومستقويين القلب اووووى ومستغنيين
ومستكترين على بعض أرزاق ربنا!!
بنسمع نصائح تسمم حياتنا لأنها
على هوانا.. لكن اللي أمرنا بيه ربنا
لأنه أصعب.. لأنه مش على هوانا
بقى يقال عليه مثاليه مبالغ فيها!!
وبنردد لبعض كلمات جميله براقه
ساعه الجد متلاقيش منها كتير
حافظ آه. ..فاهم لأ
عارف آه… مستوعب لأ
علشان كده اى نصيحه مهما كانت براقه
ومغريه للتنفيذ واى مخرج او حل لا يتفق
مع مايرضى الله.. واى سلوك يسعد من
حولك وقد يرضيك.. ويغضب ربنا
اى إستسهال وأى تنازل بتقدمه واى
تهاون فى حدود الله هو “فخ النفس”
تعاستنا وتأخرنا ونفاذ صبرنا وضيق
صدورنا وعدم توفيقنا مننا فينا
ربنا مابيظلمش حد.
“اللهم إننا نعوذ بك من شرور أنفسنا
ونعوذ بك من ضيق صدورنا
ونعوذ بك من شياطين الإنس
ونسألك السلامه من كل شر
والغنيمه من كل بر” ??