زمان يا فن تداول رواد مواقع التواصل الاجتماعي حديث إذاعي قديم  للفنان الراحل رشدي أباظة مع المذيعة الكبيرة آمال العمدة، في إحدى البرامج الإذاعية، تحدث من خلاله عن الفنان محمود المليجي.

وفي السطور التالية نستعرض لكم تفاصيل هذا الحديث

زمان يا فن

 

رشدي أباظة : انا هقول لسيادتك حاجة يا مدام آمال تعتقدى ان إحنا هنا فى مصر فيه ممثل أكبر من الأستاذ محمود المليجي؟ مفيش ..

 آمال العمدة : بنقول عليه أنتوني كوين ..

رشدى أباظة : لا هو مش انتوني كوين لانه عمر ما محمود المليجي كان فيه عنف ، انتوني كوين اعتماده دايما على العنف حتى فى الكلمة ..

آمال العمدة : طب هو مين ؟

رشدى أباظة : محمود المليجي هو محمود المليجي ومش هيبقى فيه زيه ابدا ، محمود المليجي حطوه في إطار ، حطوه في برواز اللى هو القاتل الشرير مع أن محمود المليجي عمل أدوار كان بيخليني أنا وأنا عارف أن ده تمثيل أقعد أعيط ..

آمال العمدة : تعيط ؟؟!!
رشدي أباظة : آه طبعا أعيط وأنا عارف أن ده تمثيل وعارف أزاي بيعملها، يعني من كتر ما هو عملاق بيتغلب على أي حاجة فى الدنيا ..

آمال العمدة : طب العملاق ده مخدش بطولات مطلقة ليه؟ ! تملي هو بيطلع في الخلفية أو فى الأدوار الثانية ..

رشدى أباظة : عشان دور الشرير من الصعب أنك تعمليه بطل، البطل هو اللي بيخلص على الشرير في آخر الفيلم هو ده البطل ..

آمال العمدة : طيب لو نقلنا محمود المليجي إلى السينما العالمية بقامته الفنية وتقديرك الكبير ده وأنت زميل له بعد جيله بكتير، لكن حسيته كفنان لدرجة أنه وصلك الاحساس وبتبكي وأنت عارف أن ده تمثيل لو حطيناه في العالمية هل يأخذ بطولات مطلقة ؟

رشدى أباظة : طبعا، محمود المليجي يعمل كل الأوار وده اللي أنا أتمنى أوصله فى يوم من الأيام المستوى ده ، محمود المليجي مفيش داعي أنه يتمنى لأنه وصل لكده فعلا ..

آمال العمدة : ده تواضع يا أستاذ رشدي من حضرتك أنك مش قادر تقارن نفسك بمحمود المليجي ..

رشدي أباظة : ده مش تواضع أنا عارف محمود المليجي هو إيه، هو أستاذ كبير جدًا، أنا ببقى فخور وأنا بسلم عليه مع أنه حبيبي زى أخويا، يعني لما بحط إيدي في أيده بحس أن أنا أخدت شيك بمليون جنيه ..

وبعد رحيل الدنچوان رشدي أباظة، أجرت آمال العمدة لقاءًا مع المليجي وعرضت له ما قاله رشدي عنه، فقال المليجي محدثا رشدي الغائب الحاضر:

“رشدي أنت بعيد عني دلوقتي أنما أعتقد أنك سامعني، أنا مفتقدك وحشتنى أوي” ..

قال المليجي تلك الكلمات وأنهمر في البكاء ..

إدعو لعمالقة الفن بالرحمة والمغفره ..

رحمهم الله وغفر لهم وأسكنهم فسيح جناته …

يذكر أن رشدي والمليجي شارك معًا في عدة أفلام تُعتبر من كلاسيكيات السينما المصرية مثل:

خلخال حبيبي مع نعيمة عاكف، رجال في العاصفة، وكر الأشرار مع هند رستم، الحب الضائع، غروب وشروق مع سعاد حسني، جميلة مع ماجدة، وراء الشمس، عندما نحب مع نادية لطفي، وا إسلاماه مع لبنى عبد العزيز، تجار الموت مع فريد شوقي، المشاغبون مع نجوى فؤاد، سأعود بلا دموع مع مديحة كامل، صراع المحترفين مع نجلاء فتحي وصراع في الجبل مع برلنتي عبد الحميد.